The Whitebrook

Nôl ym mis Mawrth newidiwyd enw bwyty The Crown at Whitebrook i….[drumroll please!]…The Whitebrook! Dw i’n cofio meddwl ar y pryd:

1. beth oedd y pwynt? a
2. gobeithio na thalon nhw ormod i ba bynnag cwmni cyfathrebu am yr ail frandio!

Wedi i mi fwyta yno’n ddiweddar serch hynny, mae’r ail-frandio yn gwneud synnwyr perffaith i mi. Mwy am hynny yn y man…

Os ydych am bryd o fwyd Michelin heb groesi’r bont, yna The Whitebrook yw’r bwyty agosaf i ni yng Nghaerdydd. Mae'n sicr yn werth y siwrne (awr mewn car) er mwyn cael blasu bwyd y cogydd talentog, Chris Harrod a chael profi awyrgylch heddychlon The Whitebrook.

Hyfforddwyd Harrod gan Raymond Blanc yn Le Manoir aux Quat'saisons felly does dim syndod bod The Whitebrook wedi ennill seren ar ôl agor am 11 mis yn unig.

Mae Chris Harrod yn llwyddo i wneud beth mae sawl bwyty yn ceisio/honni eu bod nhw’n gwneud: defnyddio bwyd tymhorol a lleol.

Ces i goctel Welsh Garden ar y teras cyn i mi gael fy nghinio*, y mintys yn cael ei dynnu o’r ardd, a canapés ysgafn yn cynnwys dwy crostini gyda danadl poethion (nettle) a sialot ar un, a chaws gafr a betys ar y llall.

Roedd yr amouse bouche yn syml. Y piwrî moron bach fel bwyd babi blasus ond roedd y creisionen cyw iâr yn cynnig rhywbeth mwy soffistigedig.

Roedd y dechreuad o mousse merllys, ham Sir Fynwy, perlysiau a medd (mead) Tyndyrn yn hyfryd ac yn gwneud i mi feddwl pam nad oes mwy o fwytai yn defnyddio ham Sir Fynwy.

Ces i’r cig oen Ryeland fel prif gwrs, dw i’n tybio sydd wedi dod o fferm Huntsham lawr y lôn, a hynny wedi’i goginio’n berffaith a'r llysiau haf yn ysgafnhau’r pryd.

I lanhau’r daflod cyn y pwdin ces i rywbeth seiliedig ar Parma violet. Roedd fy nghariad yn dwli ar hwn a minnau’n meddwl fy mod i’n bwyta bar o sebon.

Ces i mousse arall fel pwdin – mousse mafon y tro hwn gyda detholiad o fafon Swydd Henffordd sorbed perlysieuol a choco. Y pryd yn ysgafn, heb fod yn felys o gwbl ac yn ddiweddglo perffaith.

Roedd y gweinydd yn cyflwyno pob un o’r cyrsiau ac yn cyfeirio at wahanol gynhwysion ac yn dweud “picked from our garden” neu “x miles down the road”. A dyma fi nôl at yr ail frandio. Mae’r enw newydd yn gwneud synnwyr perffaith, mae’r bwyty yn cynnig Whitebrook ar blât, dyma yw The Whitebrook.

The Whitebrook
Abergwenffrwd
Sir Fynwy
NP25 4TX
01600860254

info@thewhitebrook.co.uk
Facebook/TheWhitebrook
@TheWhitebrook

*Bwydlen pris osodedig amser cinio: 2 gwrs am £25 a 3 chwrs am £29

Il Pastificio - perl Penylan

Mae’n gychwyn pennod newydd i fwyty Il Pastificio heddiw (8fed o Orffennaf). Mae bwyty Il Pastificio yn gadael Heol Wellfield ac yn agor eu drysau am y tro cyntaf ar Heol Penylan, cyferbyn â thafarn The Claude.

Gyda hi’n anodd iawn cael bwrdd, mae’n beth da bod Il Pastificio nawr mewn bwyty llawer mwy.

 

Dw i wedi cwympo mewn cariad gyda’r lle. Yn syml, mae’n wych. Mae personoliaeth ac egni yn perthyn i’r lle sydd ddim ar gael unrhywle arall yng Nghaerdydd. Mae’r cogydd yn llawn bywyd ac yn cyfarch a sgwrsio gyda’r cwsmeriaid. Mae’r gegin agored yn llwyfan iddo fe a’r tîm i berfformio a gyda’r cogyddion a gweinwyr yn siarad Eidaleg, mae’r naws yn hyfryd. Dw i’n gobeithio bydd y fangre newydd yn gallu ail greu’r awyrgylch yma. Yn sicr, dw i’n gobeithio bydd cegin agored yno er mwyn i’r cwsmeriaid cael gweld y cogyddion yn perfformio. 

Mae’r bwyd ei hun yn hynod o syml. I ddechrau gofynnais i am gorgimwch mawr, tomato a saws tomato sbeislyd a dyna’r union beth ges i. Doedd dim byd ‘cheffy’ am y pryd, dim ond bwyd syml wedi’i goginio’n dda.

Corgimwch mawr (£7.95)

Roedd yr un peth yn wir am y prif gwrs. Stecen llygad yr asen gyda sbigoglys a chaws gorgonzola. Syml a blasus. Roedd y risotto gydag ysbinbysg y môr yn arbennig. Ffiledwyd y pysgodyn mewn eiliadau ac fe ffriwyd yn ysgafn i greu pryd tyner iawn.

Stecen 'ribeye' gyda sbigoglys a chaws gorgonzola (£23.95)

Risotto gydag ysbinbysg y mor (£18.95)

Roedd y gwin yn llifo erbyn hyn ac er i mi deimlo’n llawn, roedd gweld pwdinau ar fyrddau pobl eraill yn ormod o demtasiwn i mi.

Fy newis i oedd y darten lemwn. Roedd y crwst yn denau ac yn frau ond gallu cynnal y llenwad.

Crostata al Limone £4.50

Ar ddiwedd noson llawn hwyl, daeth y cogydd allan eto a chynnig gwydred o limoncello am ddim i ni. Roedd y cogydd yr un mor egnïol ar ddiwedd y noson, yn wir, roedd ef allan ar ganol yr heol yn ceisio cael tacsi i rai o’u cwsmeriaid! 

Mae Il Pastificio wir yn berl o le a gyda thîm mor angerddol a brwdfrydig wrth y llyw, dw i’n sicr bydd pennod nesaf Il Pastificio yn un llwyddiannus a llewyrchus.

Barburrito

Dyma’r bwyty cadwyn diweddara’ i ddewis Caerdydd fel y ddinas ddelfrydol i agor cangen newydd. Gydag enwau mawr fel Wahaca, Burger & Lobster a Carluccio's wedi agor yn ddiweddar, mae gan y cwmnïau mawr hyder yn sîn fwyd y brifddinas.

Agorwyd cangen gyntaf Barburrito ddegawd yn ôl ac ar ôl ennill gwobr BBC Best Newcomer yng ngŵyl fwyd Manceinion mae’r cwmni wedi tyfu’n gyflym gyda’r gangen yng Nghaerdydd yn nodi agoriad y deuddegfed mewn cyfnod gymharol fyr.

Dwi wedi profi bwyd Barburrito eisoes (cangen gorsaf drên Llundain Paddington) ond mi oedd hwn yn brofiad gwahanol. Mae’r fwydlen yn newydd ac mae gwedd y bwyty yn wahanol.

Mae’r fwydlen newydd yn cynnig detholiad o burritos, tacos, quesadillas a tortillas ac mae’r prisiau’n amrywio o £4.50 i £7.95. Rhesymol tu hwnt.

Fel rhan o lansiad y bwyty ces i wahoddiad i baratoi burrito fy hun:

Ar ôl dysgu sut i berffeithio'r grefft o blygu lapio, es i du ôl i'r llinell a dewisodd fy nghyfuniad hun o flasau i wneud fy burrito. Roedd amrywiaeth dda o opsiynau, o borc wedi’u tynnu, cig eidion wedi'u torri'n fân a stêc wedi’u golosgi i reis, ffa, pupur a winwns, colslo creisionllyd a sawl opsiwn o saws. Es i am y cig eidion, winwns melys, salad a hufen sur. Syml ond hynod o flasus a gyda’r burrito wedi’i lapio’n dyn, gwnaeth y wrap aros mewn darn hyd nes y llond pen olaf. Arwydd o burrito da!


Er mae bwyty cadwyn ydyw, mae rhaid canmol ei ymrwymiad i’r amgylchedd a braf yw cael darllen am y camau ymarferol maen nhw’n eu cymryd.

Am fwyd Mecsicanaidd cyflym a chymharol rad, mae Barburrito yn taro’r nod.

http://www.barburrito.co.uk/
https://www.facebook.com/BarburritoUK
@barburtweeto

Bwyty James Sommerin yn flwydd oed

Roedd fy mlog diwethaf yn sôn am ddiffyg bwytai sêr Michelin yng Nghaerdydd. Yn wir, mae’r bwyty agosaf ym Mryste. Wedi dweud hynny, dwi’n siŵr bydd canllaw Michelin 2016 yn cynnwys newyddion da i fwyty James Sommerin.

Ers i’r bwyty agor mae e wedi denu sylw adolygwyr papurau Prydeinig fel yr Independent a’r Telegraph. Yn gyffredinol, geiriau positif sydd gyda’r adolygwyr o ran y bwyd ond mae’r un hen bwynt yn codi dro ar ôl tro parthed y diffyg gwneud yn fawr o'r lleoliad unigryw.

Dwi wedi bwyta ym mwyty James Sommerin sawl gwaith erbyn hyn ac mae’r lle yn gwella dro ar ôl tro. Dydy’r bwyty ddim wedi newid rhyw lawer ond mae mân newidiadau fel chwarae cerddoriaeth yn meddalu’r awyrgylch, mae’r tîm gweini llawer fwy hamddenol a llai hunan-ymwybodol hefyd. Wedi dweud hynny, dyma brif wendid y lle – anghyson yw’r gwasanaeth. Dwi wedi bod yn ffodus ac wedi profi gwasanaeth heb ei ail ond dwi wedi clywed am sawl enghraifft o wasanaeth slac. Yn wir, mae’r bwyty yn ymwybodol o hyn ac mae James a Louise wedi synnu braidd gyda’r diffyg sydd o weinwyr da.

Mae’r awyrgych yn well ers i fwyty James Sommerin cynnig te prynhawn. Tua diwedd gwasanaeth cinio er enghraifft, mi oedd y bwyty yn tawelu ond mae cwsmeriaid sy’n dod am de prynhawn yn golygu bod yr awygylch da yn cael ei gynnal drwy gydol y prynhawn.

Y bwyd. Dyma’r peth gorau heb os. Darperir bwydlenni gosodedig o 2, 3 chwrs (amser cinio), 5, 7, 10 neu 14 ar gyfer yr hwyrnos. Roeddwn i’n becso ychydig o feddwl na fyddai'r bwydlenni yma yn newid yn rhy aml. Ond yn wir, mae’r bwydlenni yn esblygu gyda’r tymhorau ac fel bod tim James Sommerin yn creu a datblygu prydau newydd.

Mae yna un eithriad, sef y canapés. Dwi wedi bwyta yno rhyw 7 gwaith erbyn hyn a’r un yw’r canapés bob tro: panna cotta corn melys, hadog a bacwn a thryffl arancino. Tra bod rhain yn wych – mae’n hen bryd cynnig danteithion newydd ar ôl blwyddyn gyfan!

Dyma enghreifftiau o rai o brydau cofiadwy James Sommerin dros y flwyddyn diwethaf.

Pen-blwydd hapus a phob lwc ar gyfer y dyfodol!

Restaurant James Sommerin
The Esplenade
Penarth
CF64 3AU
029 20706559
@RestaurantJS

...

...

Carluccio's, Bae Caerdydd

Mae'r bae llawn bwytai cadwyni a pharhau mae'r tuedd yma. Yn ddiweddar mae bwyty Bill's wedi agor lle oedd Woods ac nawr mae bwyty poblogaidd Carluccio's lle oedd bwyty Cafe Rouge gynt.

Yr wythnos diwethaf cafwyd lansiad bwyty diweddaraf Carluccio's a ges i'r cyfle i gwrdd a'r dyn ei hun.

Nid yw Antonio'n gweithio gyda'r bwyty bellach ond mae dal i fod yn llysgennad i'r cwmni. Pleser oedd cael cwrdd gydag ef a chlywed y rhesymau tu nôl iddyn nhw agor bwyty arall yn y brifddinas. Dyma'r hyn oedd gyda'r dyn ei hun i ddweud:

Carluccio's

Bae Caerdydd

CF10 5BZ

02920460201

@carluccioscaffe

@cookcarluccio

Ble mae'r sêr Michelin?

Ble mae mynd ar gyfer pryd o fwyd ffansi? Gofynnir y cwestiwn yma i mi yn aml. Basau'n wych medru ateb pawb gyda rhestr o fwytai gyda seren Michelin yng Nghaerdydd ond does gennym ni'r un, eto.

Dyrnaid o lefydd bwyta moethus sydd yn y brifddinas: James Sommerin ym Mhenarth, Purple Poppadom yn Nhreganna, a Park House (ond mae’r safon yn anghyson) yng nghanol y dref ond ble arall? Ble mae’r bwytai o safon sy’n haeddu seren Michelin?



Wel, dyma’r ateb…

Mae’r tabl isod yn rhestri’r bwytai un seren Michelin o fewn awr o siwrne i Gaerdydd. Cliciwch ar enw’r bwyty am wybodaeth bellach a chliciwch ar bellter y siwrne er mwyn cael cyfarwyddiadau ar sut i gyrraedd y bwyty. (Os ydych yn darllen hwn ar ffôn symudol, trowch y ddyfais 90 gradd).

Milltir	Bwyty	Pellter (car)	Cinio	Cinio Nos
41.3	Casamia	50munud	£38 x 6 cwrs	£68 x 10 cwrs
42.2	Wilks	57munud	£19 x 2 gwrs	£45 x 3 chwrs
42.3	Whitebrook*	52munud	£25 x 2 gwrs	£54 x 3 chwrs
44	The Walnut Tree Inn*	52munud	£25 x 2 gwrs	£45 x 3 chwrs
51.3	The Pony & Trap	1awr2mun	£30 x 3 chwrs	£60 x 6 chwrs
54	Bybrook (Castell Combe)	1awr4mun	£25 x 2 gwrs	£74 x 7 cwrs
55	The Bath Priory	1awr6mun	£20 x 2 gwrs	£62 x 2 gwrs
56.1	The Park (Lucknam Park)	1awr5mun	£80 x 3 chwrs	£105 x 7 cwrs
bwytai eraill seren Michelin yng Nghymru
105	The Checkers	2awr31mun	£40 x 3 chwrs	£75 x 7 cwrs
118	Ynyshir Hall	2awr43mun	£35 x 5 cwrs	£55 x 3 chwrs
141	Tyddyn Llan	3awr33mun	£25 x 2 gwrs	£57 x 3 chwrs

*yng Nghymru

Bwyty 2 seren Michelin:

Milltir	Bwyty	Pellter (car)	Cinio	Cinio Nos
68.9	Le Champignon Sauvage	1awr14mun	£26 x 2 gwrs	£59 x 3 chwrs

Bon apétit!

Fed

Ger Cineworld mae bwyty ‘all you can eat’, Fed. Mae’r bwyty yn cynnig dros gant o brydau gwahanol o bob cwr o’r byd. Nid dyma’r math o fwyty sy’n apelio ataf fel arfer ond maen hynod o boblogaidd gyda mwyafrif o giniawyr y brifddinas. Nos Iau diwethaf roedd y lle yn dan ei sang.

Mae’r ystod o fwyd ar gael yn helaeth. Gallaf feddwl am lefydd gwell i fwyta bwyd traddodiadol Eidalaidd, Meciscanaidd, Sushi, stêc ayyb ond allai ddim meddwl am le sy’n cynnig cystal amrywiaeth. Mae rhywbeth at ddant pawb ar gael yn Fed.

Fel bwytai eraill ‘bwytewch faint a fynnwch’ mae rhai o’r prydau yn eistedd mewn crochanau - dull o arlwyo sydd ddim yn apelio at bawb. Un o gryfderau Fed serch hynny yw’r cogyddion sydd wrth law i goginio’r bwyd yn ôl eich dewis. Roedd y corgimwch o’r adran gril er enghraifft wedi’i goginio’n syml ac yn dda.

A minnau’n ceisio cadw’n heini, roeddwn ni’n hapus gweld lot o fwyd iachus ar gael. Roedd y saladau wir yn neis. Y cynhwysion yn ffres ac roedd cyfuniad o oren suddog, betys a chaws feta yn flasus tu hwnt.

Roedd y sushi yn ddigon dymunol hefyd. Well gen i fwy o bysgod gyda fy nigiri ond am £13.99 roeddwn i’n cael dêl eitha’ da!

Roedd y dosa fresh o’r gegin Indiaidd yn arbennig o dda – y cytew yn denau ac yn ysgafn a’r sawsusau llawn blas sbeislyd.

Rhaid i mi i gyfaddef doedd gen i ddim awydd i fwyta llawer o’r bwyd oedd wedi’i baratoi’n barod. Roedd toes y pitsa er enghraifft angen mwy o dân ac roedd safon y caws yn wan. Ond gyda digon o ddewis o’r ceginau byw, doedd hyn ddim yn broblem.

Prif gryfder Fed yw’r gwasanaeth. Mewn bwyty anferth mae’r awyrgylch yn gallu bod yn amhersonol iawn. Roedd ein gweinwyr, Laura a Sanjeev, yn hynod o gyfeillgar ac yn awyddus iawn i sicrhau fy mod i a fy nghariad yn mwynhau’r noson.

Os oes criw mawr ohonoch yn meddwl mynd am bryd o fwyd ond methu â chytuno ar fwyty, yna mae'n werth rhoi cynnig ar Fed.

Ces i fy ngwahodd gan Fed i adolygu'r bwyty

Fed
Caerdydd
CF10 2EN
02920 341501
www.wearefed.co.uk
@fedcardiff #wearefed
Facebook/FeDCardiff