2* i fwyty James Sommerin?

Does dim un bwyty yng Nghaerdydd gyda seren Michelin. Yr unig brifddinas yn y Deyrnas Unedig heb seren. Mae’r gymhariaeth gyda phrif ddinasoedd eraill y DU yn un diflas:

Llundain 71; Caeredin 4; Belfast 2; a Chaerdydd...0.

Er bod rhai yn edrych ar ganllaw Michelin fel un sydd yn llai perthnasol, mae’n parhau i fod yn ganllaw dylanwladol tu hwnt. Mae’n newyddion da felly bod yr athrylith James Sommerin wedi agor ei fwyty Restaurant James Sommerin llai na 10 milltir tu allan i’r brifddinas.

Llwyddodd y bwyty i ennill seren nôl yn 2016 ac mae wedi ail adrodd y gamp bob blwyddyn ers hynny. Dim ond 6 bwyty sydd gyda seren Michelin trwy Gymru gyfan. Dwi wedi profi bwyd James Sommerin sawl tro erbyn hyn ond mi oedd fy ymweliad diweddar yn un arbennig iawn. Y tro hwn ces i brofi bwydlen arbennig 14 cwrs ar y ‘chef’s table.’

Yn wahanol i fwytai eraill, mae’r ‘chef’s table’ yn rhywbeth mae’r bwyty wedi'i gynllunio fel rhan o’r gegin a nid, fel bwytai eraill, bwrdd isel wedi’i osod mewn cornel y gegin. Dyma oedd fy ngolygfa i o'r wledd.

Dros 4 platiad bach i ‘ddiddanu’r daflod’ ces i gyflwyniad i’r cogyddion a gwahanol adrannau y gegin. Y lasagne, unwaith eto, yn sefyll allan fel yr amouse bouche gorau (llun isod).

Un peth oedd wedi fy nharo i oedd pa mor dawel oedd y gegin. Mi oedd y bwyty’n llawn ac ar unrhyw un adeg roedd y gegin yn paratoi hyd at 30 pryd gwahanol. Yn groes i fy nisgwyliadau, doedd dim gweiddi, rhegfeydd na thensiwn rhwng y cogyddion. Ag eithrio cadarnhau amseru coginio prydau ar gyfer gwahanol byrddau, roedd pawb wedi ffocysu ar baratoi perffeithrwydd ar blat ac hynny dro ar ôl tro.

Roedd y ddeinameg rhwng James a’i ferch, Georgia, yn un arbennig hefyd. Gyda’r diwydiant yn brin o gogyddion o safon, mae James a’i wraig Louise, yn llythrennol, wedi datblygu staff eu hunain. Ond 20 mlwydd oed yw Georgia ac mae wedi ennill dyrchafiad i fod yn sous chef i’w thad, James. Ai James a Georgia yw ein fersiwn ni o Juan ac Elena Arzak? Amser a ddengys.

Mae'r fwydlen yn amrywio bob un tro ac mae'n gyfle i'r cogyddion i ddangos eu doniau a pheidio bod yn gaeth i'r fwydlen a la carte. Efallai bod bwyta 14 cwrs yn swnio'n ormod i rhai ond mi roedd y maint o fwyd a thempo y cyrsiau yn gweddu'n berffaith i brynhawn o loddesta. Cyfle i eistedd nôl a phrofi bwyd heb ei ail wrth iddo ymddangos fel belt cludo o berffeithrwydd cogino. Am £150 y pen, mae'r fath brofiad yn cwympo i gategori 'amheuthun achlysurol' ond mae'n amheuthun sydd yn werth ei brofi.

Mae'r coginio yn sicr yn cyfrannu at godi statws a newid canfyddiad pobl at safon bwytai Cymru. Ydy'r coginio'n ddigon i ennill ail seren Michelin? Bydd rhaid i ni aros tan fis Hydref ond ar sail fy mhrofiadau i ym mwytai eraill gyda 2 seren - mae'n hen bryd.

Restaurant James Sommerin
https://www.jamessommerinrestaurant.co.uk/
The Esplanade
Penarth
CF64 3AU
02920706559

Bwyty James Sommerin, 2017

Mae darllenwr y blog yn deall fy mod i’n hoff iawn o goginio James Sommerin. Ar ôl ennill a chadw seren michelin am saith mlynedd o weithio yn Crown at Whitebrook agorodd James fwyty lawr ym Mhenarth. Dyma fy adolygiad o’r bwyty yn 2014 a 2015. Er i mi fwynhau’r profiadau, roeddwn i’n clywed gan eraill feirniadaeth am yr awyrgylch a safon y gwasanaeth.

Awyrgylch

Dyma oedd gan bapur Y Telegraph i'w ddweud nôl yn 2014:
“[James Sommerin] won't create a wonderful restaurant unless he loosens up, throws back the curtains and embraces his location” 

Ar ôl ymweliad diweddar, mae’n amlwg bod James a’i dîm wedi gwrando ar yr adborth yma ac wedi buddsoddi (dros £250k) ar:

• ffenestri newydd sy’n caniatái i gwsmeriaid allu gweld golygfeydd o’r môr;
• seddi gwahanol liwiau;
• brasluniau o syniadau prydau ar ddrws gwydr yng nghanol y bwyty;
• llen rhwng y bar a’r bwyty; a
• cherddoriaeth fodern.

Mae’r rhain i gyd yn ychwanegu at naws llawer mwy anffurfiol ac yn brawf bod James Sommerin wedi “loosened up”.

Gwasanaeth

Mae James Sommerin wedi bod yn ddigon agored i’r feirniadaeth yma a dwi wedi clywed gan fy mrodyr a’m ffrindiau am enghreifftiau o wasanaeth go wael. I wella’r sefyllfa, mae James a’i gogyddion yn arlwyo’r bwyd eu hunain. Mae hyn wedi gweithio’n dda ym mwyty Casamia ym Mryste ac ar ôl ymweliad diweddar, roedd gwasanaeth y bwyty i weld yn slic.

Bwyd

Er bod y gwasanaeth a’r awyrgylch yn elfennau pwysig iawn yn y profiad o fwyta mas, y bwyd sy’n holl bwysig. A pharhau i wella ma’ safon y bwyd. Mae 2017 wedi bod yn flwyddyn dyngedfennol i’r bwyty. Mae’r bwyty wedi aeddfedu ac wedi ffurfio personoliaeth ac mae wedi ennill gwobrau di-ri.
Mae arolygwyr Michelin wedi cydnabod talent James Sommerin ac mae nawr yn un o saith bwyty yng Nghymru sydd â seren.

Mae arolygwyr bwyd AA o’r farn bod bwyty James Sommerin ymhlith 10% o fwytai gorau yn y DU (3 Rosettes) ac eleni, James Sommerin yw AA Restaurant of the Year for Wales.

Mae’r patrwm yn parhau o ddarllen canllaw The Good Food Guide, 2017 sydd wedi dyfarnu sgôr o 7/10 (“high level of ambition and individuality, attention to the smallest detail, accurate and vibrant dishes”) ac mae ymhlith y 50 bwyty gorau yn y DU (34).

Tra bo’ 2017 yn profi i fod yn un llwyddiannus iawn i fwyty James Sommerin, dwi’n credu bod mwy i ddod. Ar ôl prydau diweddar yn Champignon Sauvage (2* michelin) a Moments (2* michelin), dwi o’r farn bod bwyd James Sommerin cystal ac yn haeddu ail seren a rosette AA arall.
Mae’n anodd proffwydo beth ma’r arolygwyr yn ei feddwl ond dwi’n sicr o un peth, rydyn ni’n ffodus iawn i gael cogydd mor ddawnus â James Sommerin yn gweithio ym Mhenarth.

Restaurant James Sommerin
The Esplanade
Penarth
CF63 3AU
02920706559
http://www.jamessommerinrestaurant.co.uk/
facebook/restaurantjamessommerin
@RestaurantJS
@JSommerin

lluniau o ffrwd Twitter @JSommerin a @RestaurantJS

Bwyty James Sommerin yn flwydd oed

Roedd fy mlog diwethaf yn sôn am ddiffyg bwytai sêr Michelin yng Nghaerdydd. Yn wir, mae’r bwyty agosaf ym Mryste. Wedi dweud hynny, dwi’n siŵr bydd canllaw Michelin 2016 yn cynnwys newyddion da i fwyty James Sommerin.

Ers i’r bwyty agor mae e wedi denu sylw adolygwyr papurau Prydeinig fel yr Independent a’r Telegraph. Yn gyffredinol, geiriau positif sydd gyda’r adolygwyr o ran y bwyd ond mae’r un hen bwynt yn codi dro ar ôl tro parthed y diffyg gwneud yn fawr o'r lleoliad unigryw.

Dwi wedi bwyta ym mwyty James Sommerin sawl gwaith erbyn hyn ac mae’r lle yn gwella dro ar ôl tro. Dydy’r bwyty ddim wedi newid rhyw lawer ond mae mân newidiadau fel chwarae cerddoriaeth yn meddalu’r awyrgylch, mae’r tîm gweini llawer fwy hamddenol a llai hunan-ymwybodol hefyd. Wedi dweud hynny, dyma brif wendid y lle – anghyson yw’r gwasanaeth. Dwi wedi bod yn ffodus ac wedi profi gwasanaeth heb ei ail ond dwi wedi clywed am sawl enghraifft o wasanaeth slac. Yn wir, mae’r bwyty yn ymwybodol o hyn ac mae James a Louise wedi synnu braidd gyda’r diffyg sydd o weinwyr da.

Mae’r awyrgych yn well ers i fwyty James Sommerin cynnig te prynhawn. Tua diwedd gwasanaeth cinio er enghraifft, mi oedd y bwyty yn tawelu ond mae cwsmeriaid sy’n dod am de prynhawn yn golygu bod yr awygylch da yn cael ei gynnal drwy gydol y prynhawn.

Y bwyd. Dyma’r peth gorau heb os. Darperir bwydlenni gosodedig o 2, 3 chwrs (amser cinio), 5, 7, 10 neu 14 ar gyfer yr hwyrnos. Roeddwn i’n becso ychydig o feddwl na fyddai'r bwydlenni yma yn newid yn rhy aml. Ond yn wir, mae’r bwydlenni yn esblygu gyda’r tymhorau ac fel bod tim James Sommerin yn creu a datblygu prydau newydd.

Mae yna un eithriad, sef y canapés. Dwi wedi bwyta yno rhyw 7 gwaith erbyn hyn a’r un yw’r canapés bob tro: panna cotta corn melys, hadog a bacwn a thryffl arancino. Tra bod rhain yn wych – mae’n hen bryd cynnig danteithion newydd ar ôl blwyddyn gyfan!

Dyma enghreifftiau o rai o brydau cofiadwy James Sommerin dros y flwyddyn diwethaf.

Pen-blwydd hapus a phob lwc ar gyfer y dyfodol!

Restaurant James Sommerin
The Esplenade
Penarth
CF64 3AU
029 20706559
@RestaurantJS

...

...

James Sommerin

Hir yw pob aros. Nôl ym mis Mawrth 2013 cyhoeddodd Chef Hermes ar ei flog y posibilrwydd y byddai James Sommerin yn dod i Benarth. Roedd sôn byddai'r bwyty yn agor ym mis Hydref, yna Tachwedd, yna mis Ionawr…Mawrth…Ebrill...

Tra bo pawb yn aros, cyhoeddodd Mark Adams gyfweliad gyda James Sommerin ei hun nôl ym mis Ionawr. Diddorol oedd clywed athroniaeth y cogydd a chlywed ffeithiau sydd yn codi ael neu ddwy - £70,000 am y ffwrn er enghraifft! O’r diwedd, agorwyd y bwyty ym mis Mai a gyda fy nghariad yn dathlu ei phen-blwydd, roedd hwn yn esgus perffaith i mi brofi’r lle.

Mae sawl person wedi sôn nad ydy’r bwyty wedi gwneud yn fawr o botensial yr olygfa. Pwynt teg, ond yr hyn wnaeth ddal fy llygaid i, oedd y ffenestr oedd yn cynnig golygfa o’r cogyddion yn y gegin.

Does dim bwydlen a la carte, ond ceir dewis o fwydlenni gosodedig pump, saith neu 10 cwrs, a bwydlen penodol ar gyfer amser cinio.

Penderfynais i fynd am saith cwrs (£70). I ddiddanu'r daflod roedd panna cotta corn melys, hadog a bacwn, gougère ysgafn ac arancino tryffl.

Doedd dim fawr o ddewis o ran bara. Gwyn neu frown. Doedd dim byd anhygoel am rhain ac roedd rhan ohonof yn meddwl y bydddai’n well peidio â chynnig bara o gwbl. Mae bwyta saith cwrs blasus yn fwy na digon heb lenwi ar fara.

Cyn ddechrau ar y fwydlen go iawn roedd caws pôb Cymreig. Daeth y gweinydd i arllwys consommé winwns perffaith a chlir wrth y bwrdd i gwblhau’r pryd.

Nesaf daeth hoff bryd fy nghariad - pys, parmesan, saets ac ham Serrano. Roedd e'n wych er roedd prinder yr ham Serrano yn amlwg. Roedd angen cic yr ham hallt ar y pryd. Esgeulus ac anffodus. O ystyried pa mor syml oedd prif gynhwysyn y pryd - pys - roedd e’n blatiad hynod o flasus.

I ddilyn roedd tryffl, madarch gwyllt, merllys a chaws Pearl Wen (sic.). Hynod o flasus - a blas y madarch yn ogoneddus. Dwi'n gwybod bod rhai yn blino ar ddefnyddio 'foam' mewn pryd ond i mi mae'n iawn o'i goginio'n gywrain, fel yn yr achos yma. Roedd blas tryffl yn amlwg heb ddominyddu. Caws oedd y prif flâs ond dydw i ddim yn sicr a oedd cydbwysedd y fwydlen yn gywir, yn enwedig ar ôl caws pôb Cymreig y cwrs blaenorol.

Cynffon ychen, barlys, persli ac winwns ddaeth nesaf. Roedd y creisionen panasen yn siomedig, heb gael digon o dân - doedd cnoi trwy llysieuyn llawn cellwlos ddim yn bleserus. Roedd popeth arall yn wych. Y saws yn gyfoethog a llawn blas a chynffon yr ychen yn feddal. Roedd y barlys yn cynnig bach o swmp i'r pryd, y persli yn cynnig nodyn ffresh a'r winwnsyn yn berffaith o felys.

Pysgodyn nesa. Yn benodol penfras wedi'i fygu, ffacbys, melynwy a blodfresychen. Pryd gwana'r saith cwrs yn ôl fy nghariad, ond mwynhais i'r cyfuniad o'r wy a physgodyn.

Y cwrs nesaf oedd seren y noson. Tri gwahanol rhan o borc wedi’u coginio’n berffaith: lwyn, pen a bola. Y pryd yn fy atgoffa o, ac yn welliant ar, ei bryd 'nose to tail' tra oedd James Sommerin yn y Crown at Whitebrook. Gwych, gwych, gwych!

Roedd y cwrs nesa yn enghraifft arbennig o bontio rhwng cyrsiau sawrus a'r melysfwyd. Y gyfrinach oedd cydbwysedd perffaith o gaws brie, afal ac hufen fanila. Y caws hallt hufennog yn tymheru melystra'r afal a'r fanila.

Wedyn cafwyd pwdin diddorol oedd yn cyfuno sbeis ras el hanout gyda ffenigl a phîn afal. Doeddwn i erioed wedi bwyta ras el hanout mewn pwdin o'r blaen ond roedd e'n berffaith gyda'r hufen iâ.

Erbyn hyn roedd y gwin (Villa Wolf Pinot Blanc 2012, Pfalz, Yr Almaen (£25); Tamar Ridge Devil’s Corner Pinot Noir 2012, Tasmania (£38); a gwydraid o Perdido Late Harvest Chardonnay, Patagonia (£4.95)) yn dechrau cael effaith a does dim fawr o gof gen i o'r amrywiaeth o bwdinau ychwanegol cawsom ni fel anrheg pen-blwydd. Roedd fy nghariad wedi cofio'r pwdin siocled a ffa tonca fel ei phwdin gorau y noson.

Braf oedd cael siarad gyda James Sommerin ar ddiwedd y noson a chael dysgu mwy am ei weledigaeth; bwyd ardderchog am bris rhesymol mewn awyrgylch hamddenol. Does dim rhaid i'r gwesteion wisgo'n ffurfiol. Mae'r gweinyddion yn gymwynasgar ac effeithiol heb fod yn or-ffurfiol.

Breuddwyd James yw ennill 2 seren Michelin. Mae tipyn o waith i'w wneud os ydy e am wireddu'r freuddwyd hon, ond dwi'n ffyddiog y daw seren i'r brifddinas yn sgil holl ymroddiad a dyfeisgarwch James Sommerin.

Bwyty James Sommerin
Penarth
CF64 3AU
0772221672

@RestaurantJS
@JSommerin
@LSommerin
@MattyWaldo
@scottgreve
@danylancaster

Pier64: The belly is happier than the bank

On the 16th of June 2013 the family and I went to Pier64, a steakhouse, to celebrate Father’s Day. Pier64 is located in Penarth marina – a lovely setting made better by the lovely weather.

With Francis Dupuy (formerly of Le Gallois) at the helm I had high expectations. My expectations were elevated even further when I saw the prices for some of the dishes!

The menu has a good variety of fish, salads and meats and with us celebrating Father’s Day, I opted for the Chateaubriand, reasonably priced at £49.95 (between 2). The quality of the meat was excellent and cooked to perfection (rare), as were the vegetables, cooked al dente, and the rich dauphinoise potatoes worked well with such a lean meat. The red wine jus was beautifully flavoursome.

The meal was excellent and I enjoyed every element. The price is the only thing that would make me think twice before returning. The Chateaubriand is reasonable enough but with every other component: buttered greens £3; dauphinoise potatoes £3; foie gras £7.95; and red wine jus £2, I was parting with £41 for a main course – not to mention wine, water or dessert!

It’s worth noting that cheaper meals are available and they also offer a set lunch menu which is very reasonable. 2 courses for £12.95 and 3 courses for a mere £15.95.

It wasn’t me paying so I happily ordered the chocolate fondant with vanilla ice cream, (£5.95) for dessert. This was perfect. Light sponge yielding under my spoon giving way to velvety chocolate. This, along with the ice cream provided a perfect end to the meal – and without being overly sweet either.

With Côtes du Rhône 100% Grenache Julien Mus (£24.95) and a double espresso for £3.75 it would have been cheaper for me to have eaten at Alain Ducasse at the Dorchester – and they have 3 Michelin stars!

Despite the cost, Pier64 is an excellent steakhouse cooking top notch food. I’m looking forward to going again though I’ll most probably order something cheaper.

Pier 64: Y bola yn hapusach na’r banc

Ar yr 16eg o Fehefin 2013 es i mas gyda’r teulu i Pier64 am ginio i ddathlu Sul Y Tadau. Bwyty, bar a thŷ stecen ydyw, lawr ym marina Penarth - lleoliad delfrydol o ystyried y tywydd braf cawsom ni.

Gyda Francis Dupuy (yn gynt o Le Gallois) wrth y llyw mi oeddwn i’n disgwyl bwyd o safon uchel. Cynyddodd y disgwyliad eto wedi i mi weld prisiau rhai o’r prydau!

Ar ôl diod wrth y bar ces i gyfle i edrych ar y fwydlen. Roedd yna ddigon o amrywiaeth gyda physgod, saladau a chigach.

Gyda ni’n dathlu Sul Y Tadau, a Pier 64 yn dŷ stecen, ces i’r Chateaubriand am bris digon rhesymol o £49.95 (rhwng 2). Mi oedd ansawdd y cig yn wych ac roedd wedi’i goginio’n berffaith (gwaedlyd). Mi oedd y llysiau’n wych hefyd: llysiau gwyrdd al dente; tatws dauphinoise cyfoethog, yn gweithio’n dda gyda chig â chyn lleied o fraster; a saws gwin coch yn berffaith gyda’r Chateaubriand.

Mi oedd y pryd yn wych ac fe fwynheuais i pob un elfen. Y gost yw’r unig beth sydd yn gwneud i mi feddwl ddwy waith cyn dychwelyd. Mi oedd y Chateaubriand yn rhesymol ond gyda phopeth arall: llysiau gwyrdd â menyn £3; tatws dauphinoise £3; foie gras £7.95; a saws gwin coch £2, dwi’n talu £41 am brif gwrs, heb sôn am win, dŵr na phwdin!

Mae’n werth nodi bod prydau eraill ar gael sydd llawer rhatach ac hefyd bod yna fwydlen sy’n benodol at amser cinio sy’n cynnig 2 gwrs am £12.95 a 3 chwrs am £15.95.

Nid y fi oedd yn talu felly on i’n mwy na hapus dewis ffondant siocled gydag hufen iâ fanila (£5.95) am bwdin. Mi oedd hwn yn berffaith. Sbwng yn ysgafn a gwead y siocled poeth melfedaidd yn llifo ar ôl i mi ei dorri. Gydag ychydig o’r hufen iâ roedd e’n ddiweddglo bendigedig i’r pryd – heb fod yn rhy felys chwaith.

Gyda gwin Côtes du Rhône 100% Grenache Julien Mus (£24.95) ac espresso dwbl am £3.75 mi fydde fe wedi bod yn rhatach i mi gael cinio ym mwyty Alain Ducasse at the Dorchester – ac mae 3 seren Michelin ‘da nhw!

Er gwaetha’r gost, mae Pier 64 yn fwyty arbennig o dda sy’n creu bwyd o ansawdd. Dwi’n edrych 'mlaen cael bwyta yno eto, ond bydda'i siwr o fod yn archebu prydau rhatach.